Интернет сайттардын ушундай бир жагы бар, эгер сен сайт жасатып, домендик ысым сатып алып, хостингге акча төлөй турган сайт ачып иштетип, бирок кийинчирээк ар кайсы себептерден аталган төлөмдөрду токтотсоң, сайтың же ачылбай калат, же анын дареги (домендик ысымы) башка бирөөнө өтүп кетет.
Мен да бүгүн бир иштер менен биздин каталогдо катталган айрым сайттарга кирейин деп же киралбай, же ал сайттарды табалбай калдым. Жогоруда аталган нерселерди билсем да мынчалык көп сайттын "өлүгүн" көрүү мени жаман кейитти. Болгондо да алардын көбү жакшы келе жаткан, туруктуу сайттай көрүнгөн веб-булактар болуп жатпайбы. Алардын жабылып калышы башка узун кеп. Кийин анын себептерине токтолоттурбуз. Азыр мени түйшөлткөн маселе башка.
"Өлүк" сайттардын көп болуусу каталогдун баркын кетирет. Бирок андайларды өз убагында аныктап турууга менде шарт да, мүмкүнчүлүк да жок. Ошону үчүн каталогдун колдонуучуларынан жардам сурайт элем. Эгер кимде ким ушундай бир "өлүк" сайтты таап алса, мага билдирип койсо жакшы болот эле. Аны үчүн "Конок китеби" бөлүмүндө "өлүк" сайттын аталышын жана дарегин жазып тийиштүү билдирүү калтырыңыздар. Же ушул макаланын алдында комментарий жаза турган жерде билдирүү калтырсаңыздар болот.
Аныкталган "өлүк" сайтты каталогдон дароо өчүрбөйм. Балким интернет байланышындагы же сайттын өзүндөгу бир маселеден улам ал убактылуу ачылбай жаткандыр. Бир жуманын ичинде андай сайтка 3-4 жолу киргенге аракет кылып көрөм. Бардыгында тең сайт ачлбаса - аны каталогдон алып салам.
Жакында Каталогубуздагы сайттардын саны азайа түшөт окшойт. :-( Бирок башка айла жок.
| 